Niaka-dapa teny Iavoloha ny Ampanjaka Zafisoro 6 mirahalahy

  • 8 octobre 2022
Noraisin’ny talen’ny kabinetra sivilin’ny fiadidiana ny Repoblika, Raharinirina Baomiavotse Vahinala teny amin’ny lapam-panjakana teny Iavoloha androany ireo Ampanjaka Zafisoro 6 mirahalahy. “Naniry hampita hafatra mivantana hoan’ny filoham-pirenena izy ireo, izao niakatra avy any Evato izao”, raha ny filazan’ity tomponandraikitra ity.
Ny fampandrosoana sy fampivoarana, andrandrain’ny mpiara-belona any amin’ny distrika misy azy ireo avy no nifantohan’ny resaka nifanaovan’ireo Ampanjaka ireo tamin’ity minisitry ny Tontolo iainana teo aloha ity. “Maro koa ny hetaheta nampitain’izy ireo mivantana ary ny soso-kevitra fanatsarana amin’ny fanatanterahana ny velirano sy ireo fotodrafitrasa”, hoy Raharinirina Baomiavotse Vahinala.
Ny fanirian’ireo Ampanjaka Zafisoro ireo dia “Mba tena tsy hisy intsony tokoa ny hadino sy tavela” amin’ny fampandrosoana an’i Madagasikara.
“Manana lanja lehibe ireo Ampanjaka sy Olobe amin’ny fiarahamonina malagasy. Koa zava-dehibe tokoa ny fahafahana mihaino azy ireo toy izao”, hoy ny talen’ny kabinetra sivilin’ny fiadidiana ny Repoblika.
Partagez :
Mahandry