Fijoroan’ny filan-kevi-pitantanana ny OMDA : ny fanendrena ny tale no andrasana, hoy ny minisitra

  • 27 janvier 2023

 

Tokony tsy hisy olana intsony ny fanendrena ny talen’ny Ofisy Malagasy misahana ny Zon’ny mpamorona (OMDA), taorian’ny fahalanian’ny mpikambana vaovao amin’ny filan-kevi-pitantanana, notanterahina tetsy amin’ny kianjan’ny kolontsaina sy fanatanjahantena Mahamasina ny talata 24 janoary 2023 teo hoy ny ministry ny Serasera sy ny Kolontsaina Rakotondrazafy Andriatongarivo Lalatiana androany.

Efa natolotra sy nankatoavin’ny filan-kevitry ny governemanta, hoy izy, ny tale tokony hotendrena, taorian’ny antso natao, fa ny filan-kevitry ny minisitra no mbola tsy nanendry azy, noho ny fisian’ny toe-javatra mbola tsy nazava, nitarika ny Filoha naka fotoana andinihana ny tena zava-misy, amin’ny maha Raiamandreny azy.

Voaporofo tamin’ny fifanazavana nandritra ny fihaonambe nanaovana fifidianana teo fa ny tsy fifankahazoan-kevitra no nahatonga ny savorovoro. Efa mazava sy mifanaraka amin’ny lalàna ny fandaminana matoa tanteraka sy nandraisan’ny maro anjara ny fandaniana ny mpikambana vaovao. Maherin’ny 960 ny mpanakanto nandray anjara raha manodidina ny 300 hatramin’ny 400 izany hatramin’izay.

Nanambara ny minisitra fa misokatra ho an’ny fifampiresahana ny ekipan’ny minisitera raha misy ny hevitra mety mbola tsy mazava. Eny fa na ny momba ny fanendrena ny tale aza.

Tsiahivina fa efa tapitra ny fe-potoam-piasana 3 taona ho an’ireo mpikambana 15 mandrafitra ny filan-kevi-pitantanan’ny OMDA. Efa tokony ho natao ny volana desambra aza ny fifidianana saingy nahemotra noho ny fangatahan’ny mpanakanto mba hahafahan’ny tsirairay manenjika fitadiavam-bola tamin’ny faramparan’ny taona sy ny roa herinandro voalohan’ny taona vaovao, hoy hatrany ny minisitra. Ny lalàna manan-kery no milaza fa mbola rafitra eo ambany fiahian’ny minisitera misahana ny Kolontsaina ny OMDA.

Na tsy nisy aza ny tale dia nitohy hatrany ny asan’ny OMDA, ary ambony ny tahan’ny vola azon’ny mpamorona voangona. Tsy misy nokitihin’ny minisitera ireo vola ireo fa miandry ny fijoroan’ny filan-kevi-pitantanana vaovao sy tale dia afaka misitraka izany ny mpanakanto tsirairay, hoy ny minisitra.

Partagez :
Mahandry