Mandray ny asany manomboka androany voalohan’ny volana desambra 2021 ny mpikambana vaovao 9 mirahalahy mandrafitra ny Vaomieram-pirenena mahaleo tena misahana ny fifidianana (CENI). Tontosa tetsy amin’ny Fitsarana tampony Anosy ny fianian’ireto mpikambana vaovao ireto. Lanonana ara-pitsarana, natrehin’ny Filoham-pirenena sy tomponandraikitra ambony avy amin’ny tontolon’ny Fitsarana, Antenimiera, Governemanta. Hiroso amin’ny fananganana ny birao maharitra izy ireo aorian’ny fianianana.
Mandritra ny 6 taona no hisahanany ny fikarakarana ny raharaham-pifidianana rehetra, ny fanavaozana sy fanatsarana ny lisi-pifidianana, fanovana na fananganana ny biraom-pifidianana manerana ny Nosy, fanentanana ny olom-pirenena handray anjara amin’ny fifidianana, fisorohana ny mety ho fifandirana mifandraika amin’ny fifidianana ary fanatsarana ny famoahana voka-pifidianana sy fitondrana raharaha amin’ny fitsarana mahefa.
Anisan’ny andraindraina amin’ny mpikambana vaovao amin’ny CENI, hoy ny filoha lefitry ny Antenimieram-pirenena Razafitsiandraofa Jean Brunel, ny fanamafisana ny fitokisan’ny vahoaka sy ny fanentanana mba hiakaran’ny taham-pahazotoan’ny olom-pirenena mifidy, izay nidina ambany tokoa tao anatin’ny fifidianana maromaro nifanesy teto amin’ny firenena. Nanambara koa ny mpampaka-tenin’ny CENI teo aloha, Fano Rakotondrazaka, fa andrasana amin’ny mpikambana vaovao koa ny hirosoana amin’ny fanatanterahana ny tolo-kevitra fanatsarana ny lalàm-pifidianana nentin’ny mpikambana teo aloha sy ny mpanara-maso ny fifidianana.
